ស្នេហ៍ប្រាក់ជំពាក់ជាតិ

ខ្ញុំស្រឡាញ់ខ្មែរដក់ជាប់ចិត្ត	ដក់ក្នុងគំនិតគិតគ្រប់គ្រា
ជនជាតិខ្ញុំខ្មែររស់វេទនា	រស់ច្រើនរងារគ្មានគេដឹង	។
ឯពួកបរទេសគេមិនខ្វល់	គេគ្មានអំពល់ឱ្យខ្មែរខឹង
គេចាក់គេចុចចំណុចហ្នឹង	ឱ្យអស់ព្រលឹងយើងជាខ្មែរ	។
ខ្មែរក្រោកឈ្ងោកមើលប្រវត្តិសាស្ត្រ	ឈឹចិត្តខ្លាំងណាស់កេរពុកម៉ែ
ពួកយើងដែលធ្លាប់ខ្លាំងពូកែ	ឥឡូវស្រាប់តែមួយក្រវិច	។
បើយើងលែងគិតអាណិតជាតិ	បើយើងភ្លាត់ស្នៀតហើយភ្លាំងភ្លេច
បរទេសរង់ចាំតែក្រញិច	បរទេសប្រើល្បិចក្តេចត្រួយអស់	។
ស្នេហ៍ជាតិមិនមែនស្នេហ៍តែលុយ	ពុករលួយស្អុយខ្មែរក្រៀមក្រោះ
ជាតិត្រូវលិចលុងរាស្ត្រត្រូវខ្សោះ	និយាយដោយស្មោះតាមប្រវត្តិ	។

ណុប ច័ន្ទតារា